អាកាសយានដ្ឋានអន្តរជាតិភ្នំពេញ

អាកាសយានដ្ឋានអន្តរជាតិភ្នំពេញ មានចម្ងាយប្រហែលជា 9 គីឡូមែត្រ ឬ 30-50 នាទី ចេញពី រាជធានី។ នៅពេលមកដល់ មធ្យោបាយធ្វើដំណើរអាចចូលទៅដល់កន្លែងរង់ចាំយ៉ាងងាយស្រួល។ ជាជម្រើស លោកអ្នកអាចធ្វើដំណើរជាក្រុម ឬផ្ទាល់ខ្លួនដោយ រថយន្តតាក់ស៊ីដែលមានតម្លៃជាទូទៅ 9 ដុល្លារ និង 7 ដុល្លារ សម្រាប់ម៉ូតូ តុកតុក។ ដើម្បីទទួលបានតម្លៃនេះ សូមទូទាត់ ប្រាក់នៅកន្លែង បង់ប្រាក់របស់រថយន្តតាក់ស៊ី ខាងក្នុងច្រកទ្វារចេញ។ រួចបន្តដំណើរទៅក្នុងក្រុង ដោយម៉ូតូឌុប ចំណាយប្រាក់ ប្រហែលជា 2 ដុល្លារបន្ថែមទៀត។

កំពង់ផែរាជធានីភ្នំពេញ

ការធ្វើដំណើរដោយនាវាពីរាជធានីភ្នំពេញ ទៅខេត្តសៀមរាប ចំណាយពេលប្រហែលជាបួន (4) ទៅ ប្រាំ (5) ម៉ោង។ សំបុត្រមួយមានតម្លៃប្រហែលជា 25 ដុល្លារ។

ការធ្វើដំណើរដោយនាវាពីខេត្តសៀមរាប និងក្រុងហូជីមិញ នឹងមកដល់កំពង់ផែរាជធានីភ្នំពេញ តាមបណ្តោយតីរវិថី ស៊ីសុវត្ថិ ឬផ្លូវជាប់មាត់ទន្លេ ជិតផ្លូវលេខ 104 ។

មានភោជនីយដ្ឋាន និងសណ្ឋាគារជាច្រើន នៅតាមបណ្តោយកំពង់ផែ ដែលអាចធ្វើដំណើរដល់ ដោយថ្មើរជើង ឬលោកអ្នកអាច ជិះម៉ូតូ តុកតុក ដែលចតរង់ចាំនៅក្បែរនោះ។

ធ្វើដំណើរដោយរថយន្តក្រុង

នៅក្នុងរាជធានីភ្នំពេញ មិនមានស្ថានីយរថយន្តក្រុងឡើយ រថយន្តក្រុងមកពីក្រុមហ៊ុនផេ្សងៗដូចជា ក្រុមហ៊ុនទេសចរណ៍ កាពីតូល ដឹកអ្នកដំណើរសូរិយាភ្នំពេញ និងក្រុមហ៊ុន GST Express នៅឆៀង ខាងត្បូងផ្សារធំថ្មី ផ្តល់សេវារថយន្តក្រុងដឹកអ្នកដំណើរមិនកំណត់ស្ថានីយជាក់លាក់ឡើយ។

មានសេវារថយន្តក្រុងជាច្រើនដែលធ្វើដំណើរទៅកាន់ក្រុង បាងកក ហូជីមិញ វៀងចន្ទន៍ សៀមរាប និងទីកន្លែងជាច្រើនទៀត។ រថយន្តក្រុងដែលធ្វើដំណើរផ្លូវឆ្ងាយ ភាគច្រើនឈប់ដាក់ភ្ញៀវតាមផ្លូវ ក្នុងបណ្តាទី ប្រជុំជនមួយចំនួនដូចជា ខេត្តកំពង់ធំ រហូតដល់សៀមរាប ឬពោធិ៍សាត់ រហូតដល់ បាត់ដំបង។ ក្រុមហ៊ុនទេសចរណ៍ និងផ្ទះសំណាក់មួយចំនួនក៏អាចមាន ផ្តល់សេវាកក់សំបុត្ររថយន្តក្រុង ដើម្បីទទួលបាន កម្រៃជើងសាផងដែរ។

រឺម៉ក​ ម៉ូតូ​

រឺម៉ក ម៉ូតូ​ ជាមធ្យោបាយធ្វើដំណើរដ៏ពេញនិយមមួយក្នុងទីក្រុង។ មធ្យោបាយនេះ អ្នកដំណើរអាច ជិះនៅក្នុងរ៉ឺម៉ក ដែលអូសដោយម៉ូតូមួយគ្រឿង ដែលយើងស្គាល់ថាជាម៉ូតូសណ្តោងរ៉ឺម៉ក។ តុកតុក នៅកម្ពុជា ផ្តល់ភាពងាយស្រួល​សម្រាប់អ្នកដំណើរ ព្រោះមិនមានទ្វារបើកដូច តុកតុក នៅបាងកក ឡើយ។ ជាពិសេស មានតម្លៃថោកជាងរថយន្តតាក់ស៊ី និងងាយស្រួលទស្សនាទិដ្ឋភាពក្នុងទីក្រុង។ បន្ថែមលើនេះ អ្នករត់ម៉ូតូ តុកតុក ក្នុងតំបន់ទេសចរណ៍ភាគច្រើន​អាចនិយាយភាសាអង់គ្លេសបាន ព្រោះភ្ញៀវរបស់គាត់ភាគច្រើនជាអ្នកទេសចរណ៍។

ម៉ូតូឌុប

ជាទូទៅ មានម៉ូតូឌុប ឬម៉ូតូរត់ឈ្នួលជាច្រើន នៅជុំវិញរាជធានី ដែលនេះជាមធ្យោបាយដ៏ឆាប់រហ័ស និងងាយស្រួលបំផុត។ ម៉ូតូឌុប អាចទៅដល់គ្រប់ទីកន្លែងស្ទើរតែទាំងអស់នៅក្នុងក្រុង។ តម្លៃឈ្នួល ក្នុងមួយថ្ងៃគឺ 6 ទៅ 8 ដុល្លារ អាស្រ័យលើចំនួនអ្នកជិះ និងអាចមានតម្លៃថ្លៃនៅពេលយប់។ ​​​

ដើម្បីសុវត្ថិភាព អ្នកធ្វើដំណើរដោយម៉ូតូឌុបត្រូវប្រកាន់ខ្ជាប់នូវការប្រុងប្រយ័ត្នជានិច្ច ព្រោះអាចប្រឈមមុខខ្ពស់នឹងការលួចឆក់ ឬជួបឧបទ្ទវហេតុគ្រោះថ្នាក់ចរាចរណ៍ច្រើនជាងរថយន្តតាក់ស៊ី។ សូមរក្សាទុកសម្ភារផ្ទាល់ខ្លួន របស់លោកអ្នកនៅខាងមុខអ្នក ឬចន្លោះអ្នក និងអ្នកបើកបរ។ ជាពិសេស ត្រូវបង្កើនស្មារតីប្រុងប្រយ័ត្ន ជុំវិញខ្លួនជានិច្ច។